जितपुरसिमरा । घरेलु टोली सिमरा भेट्रान्स सिमरा, सरस्वतीनगर भेट्रान्स, काठमाडौं, क्लाईभ हाउस भेट्रान्स क ोलकाता र एबिसी भेट्रान्स पोखरा यहाँ जारी चौथो जितपुरसिमरा भेट्रान्स कप अन्तर्राष्ट्रिय आमन्त्रण फुटबल प्रतियोगिताको सेमिफाइनलमा प्रवेश गरेका छन ।

पहिलो क्वाटरफाइनलतर्फ सिमरा भेट्रान्सले कटारी टाईगर भेट्रान्स, उदयपुरलाई ४–० ले हरायो । सिमराका लागि कृष्ण शाक्यले ह्याट्रिक गर्दा थप एक गोल भेषराज लिम्बुले गरे ।

दोस्रो क्वाटरफाइनलमा सरस्वतीनगर भेट्रान्सले रियल फ्रेण्डस भेट्रान्स, सिक्किमलाई ४–१ ले हरायो । सरस्वतीनगरको जितमा अनिल आचार्य, किशोर नेपाली, हर्कराज गुरुङले गोल गरे । पराजित रियल फ्रेण्डसका लागि भने मयल लेप्चाले एक मात्र सन्त्वना गोल फर्काएका थिए ।

तेस्रो क्वाटरफाइनलमा क्लाईभ हाउसले युनाइटेड बतासी भेट्रान्स, दार्जिलिङलाई ३–० ले हरायो । क्लाईभ हाउसका लागि रन्जन शंकर, विश्वजित बाग र दिपक मण्डलले गोल गर्दै टोलीलाई अन्तिम चारमा पुर्याए ।

त्यस्तै चौथो क्वाटरफाइनलमा एबिसी भेट्रान्सले नव जनजागृति क्लब भेट्रान्स, सिमरालाई ५–० को फराकिलो अन्तरले हरायो । एबिसीका लागि विकर्ण श्रेष्ठले ह्याट्रिक गर्दा कन्या सुब्बा गुरुङ र निलेन्द्र देवानले थप एक–एक गोल गरे ।

बिहीबारको खेलसँगै प्रतियोगिताको सेमिफाइनल समिकरण पनि पूरा भएको छ । असोज ४ गते हुने पहिलो सेमिफाइनलमा सिमरा भेट्रान्स, सिमराले क्लाईभ हाउस भेट्रान्स, कोलकातासँग खेल्नेछ भने दोस्रो सेमिफाइनलमा सरस्वतीनगर भेट्रान्स, काठमाडौंले एबिसी भेट्रान्स, पोखराको सामना गर्ने आयोजकले जानकारी दियो ।