कोटिहवा । रुपन्देहीको परिचित र सफल क्लब मध्ये एक लिस्नु युवा क्लब, तिलोत्तमा–१५, कोटिहवाको आयोजनामा सम्पन्न प्रथम लिस्नु यु–१४ फुटबल प्रतियोगिताको उपाधि न्यु सिर्जना क्लब, करौजियाले जितेको छ ।

तिलोत्तमा–१५, कोटिहवा स्थित पशुपति माविको खेलमैदानमा भएको फाइनल भिडन्तमा न्यु सिर्जनाले तिलोत्तमा–१४ फुटबल क्लबलाई टाईब्रेकरमा ५–३ ले हराउँदै उपाधि जित्न सफल भएको हो । त्यसअघि निर्धारित समयको प्रतिस्पर्धात्मक खेल दुवै टोलीले १–१ गोलको बराबरी खेलेका थिए ।

विजेता बनेको न्यु सिर्जनाले उपाधिसहित नगद ७ हजार हात पार्यो भने उपविजेता तिलोत्तमा–१४ ले नगद ४ हजारसहित ट्रफी, मेडल र प्रमाणपत्रमा चित्त बुझायो । न्यु सिर्जनाका निक्की थापा प्रतियोगिता कै सर्वोत्कृष्ट खेलाडी चुनिए ।

बाल तथा युवा खेलाडीहरुको प्रतिभा प्रस्फुटन गर्ने उद्देश्यका साथ आयोजना गरिएको दुई दिने प्रतियोगितामा चार युथ टोलीहरुले सहभागिता जनाएको कार्यक्रम संयोजक कुशल भण्डारीले जानकारी दिए ।