झुरझुरे । विभागीय टोली एपिएफ फुटबल क्लब, काठमाडौं यहाँ जारी सातौं बागमती गोल्डकप नकआउट फुटबल प्रतियोगिताको सेमिफाइनलमा प्रवेश गरेको छ ।

बुधबार भएको क्वाटरफाइनलतर्फ एपीएफले संकटा फुटबल क्लब, काठमाडौंलाई शुन्यका विरुद्ध १ गोलको झिनो अन्तरले हराउँदै अन्तिम चारमा प्रवेश गरेको हो ।

सहिद रंगशालामा भएको खेलको अन्तिमतिर ८३औं मिनेटमा वैकल्पिक खेलाडीका रुपमा मैदान प्रवेश गरेका सुजन कुमार पुलामीले एक मात्र निर्णायक गोल गरे । खेलमा एपीएफका मनि लामा म्यान अफ दि म्याच घोषित भए ।

प्रतियोगिता अन्तर्गत फागुन ८ गते बिहीबारको अन्तिम क्वाटरफाइनल खेल मच्छिन्द्र फुटबल क्लब, काठमाडौं र बागमती युवा क्लब, सर्लाहीबीच हुने आयोजकले जानकारी दियो ।

बागमती गाउँपालिका खेलकुद विकास समिति, झुरझुरे, मकवानपुरको आयोजनामा जारी प्रतियोगिताको विजेताले उपाधिसहित नगद १० लाख हात पार्नेछ भने उपविजेताले ५ लाख प्राप्त गर्नेछ । फाइनल खेल फागुन १२ गतेका दिन हुनेछ ।