धरान । विशुद्ध सामाजिक र परोपकारी संस्थाका रुपमा धराने युवाहरुद्वारा स्थापित नेचर क्लब, धरानको आयोजनामा यही भदौ २७, २८ र २९ गतेका दिन दोस्रो केपि राई मेमोरियल ओपन हाम्रो फुटसल कप राष्ट्रिय फुटसल प्रतियोगिता हुने भएको छ ।

धरानका पूर्व वरिष्ठ समाजसेवी केपि (काली प्रसाद) राईको स्मृतिमा उनका छोरा धरान–१३ निवासी रवि राई र स–परिवारको मुख्य प्रायोजन रहने प्रतियोगिताको विजेताले उपाधिसहित नगद २ लाख हात पार्नेछ भने उपविजेताले १ लाखसहित ट्रफी, मेडल र प्रमाणपत्र प्राप्त गर्नेछ ।

प्रतियोगिताको पुरस्कार रकममा यसपटक भारी बृद्धि गरिएको आयोजकले पत्रकार सम्मेलनमा जानकारी गरायो । यसअघि प्रतियोगिताको पहिलो संस्करणको विजेताले उपाधिसहित नगद ५० हजार हात पारेको थियो ।

त्यस्तै दोस्रो संस्करणमा सर्वोत्कृष्ट खेलाडीले नगद १५ हजारसहित ट्रफी हात पार्नेछ । अन्य विधातर्फ उत्कृष्ट गोलरक्षक, सर्वाधिक गोलकर्ता र उदियमान खेलाडीले जनही १०–१० हजार र ट्रफी प्राप्त गर्नेछन् । साथै उत्कृष्ट प्रशिक्षकलाई ५ हजार र प्रत्येक खेलको म्यान अफ द म्याचलाई १ हजार पुरस्कारको व्यवस्था गरिएको आयोजकले जानकारी दियो ।

प्रतियोगितामा सुनसरी, झापा, मोरङ, कास्की, काठमाडौं र भारतका गरी कुल १६ टोलीहरुले सहभागिता जनाउने आयोजक नेचर क्लबका अध्यक्ष कृष्ण राईले बताए । प्रतियोगिता सम्पन्न गर्न कुल १५ लाख खर्च हुने अनुमान गरिएको पनि अध्यक्ष राईले जानकारी दिए ।