काठमाडौं । बुधबारदेखि शुरु भएको साफ यु–१७ महिला च्याम्पियनसिपतर्फ साविक विजेता बंगलादेशले पनि विजयी शुरुवात गरेको छ । दिनको दोस्रो खेलमा बंगलादेशले आयोजक भुटानमाथि ३–१ को जित निकाल्दै विजयी शुरुवात गरेको हो ।

चाङलिमिथाङ स्टेडियममा भएको खेलमा बंगलादेशका लागि अल्पी अक्तरले दुई गोल गर्दा सौरवी अकन्दा प्रितीले थप एक गोल गरेकी थिईन् । उता पराजित भुटानका लागि भने रिन्जिन डेमा छोदेनले एक मात्र गोल फर्काएकी थिईन् ।

प्रतियोगिता अन्तर्गत अगस्त २२ तारीख शुक्रबारका दिन बंगलादेशले भारतको सामना गर्नेछ भने सोही दिन भुटानले नेपालसँग खेल्नेछ । स्मरण रहोस, बुधबार नै भएको उद्घाटन खेलमा भारतले नेपालमाथि ७–० को जित हात पारेको थियो ।

प्रतियोगितामा दक्षिण एसियाका कुल चार टोलीहरु मात्र सहभागि छन् । डबल राउण्ड रोबिन लिगका आधारमा हुने प्रतियोगिताको शिर्ष टोली विजेता बन्नेछ ।