काठमाडौं (एजेन्सी) । फिफा विश्वकपतर्फ अन्तिम समूहका रुपमा रहेको समूह एलतर्फ दावेदार मध्ये एक इङल्याण्ड र घानाले पनि विजयी शुरुवात गरेका छन् ।

समूहको आफ्नो पहिलो खेलमा इङल्याण्डले क्रोएशियालाई ४–२ को अन्तरले हराउँदै विजयी शुरुवात गर्यो । इङल्याण्डका लागि १२औं मिनटमै हेरी केनले पेनाल्तीमार्फत पहिलो गोल गरेका थिए ।

यद्यपि खेलको ३६औं मिनटमा मार्टिन बाटुरिनाले क्रोएशियाका लागि बराबरी गोल फर्काएका थिए । रोमाञ्चक पहिलो हाफको ४२औं मिनटमा केनले नै इङल्याण्डका लागि दोस्रो गोल थपे ।

तर त्यो गोलको अग्रता पनि इङल्याण्डले पहिलो हाफ मै गुमाउन पुग्यो । पहिलो हाफको अतिरिक्त समयमा पिटर मुसाले दोस्रो बराबरी गोल गर्दै खेललाई २–२ को स्थितिमा ल्याएका थिए ।

यद्यपि दोस्रो हाफमा भने इङल्याण्डले थप दुई गोल थप्यो । दोस्रो हाफ शुरु भएको केही मिनट लगतै ४७औं मिनटमा जुट बेलिङघमले इङल्याण्डका लागि तेस्रो गोल गरे भने अन्तिमतिर ८५औं मिनटमा मार्कस राशफोर्डले चौथो गोल गर्दै इङलिस टोलीको जित पक्का गरे ।

त्यस्तै समूह एलकै अर्को खेलमा अफ्रिकी राष्ट्र घानाले पनामामाथि १–० को संघर्षपूर्ण जित निकाल्यो । खेलको अन्तिमतिर इन्जुरी समयमा कलिब यीरान्कीले घानाका लागि एक मात्र निर्णायक गोल गर्दै टोलीलाई महत्वपूर्ण तीन अंक दिलाए ।

अब समूह चरणको दोस्रो खेलमा २३ जुनका लागि इङल्याण्डले घानासँग खेल्नेछ भने सोही दिन पनामाले क्रोएशियाको सामना गर्नेछ ।