कञ्चन । स्कलर्स होम एकेडेमी रुपन्देहीमा जारी ११औं हिमालयन कप नकआउट फुटबल प्रतियोगिताको सेमिफाइनलमा प्रवेश गरेको छ ।

सोमबार भएको अन्तिम क्वाटरफानलमा फर्साटिकर युवा क्लबलाई टाइब्रेकरमा ७–६ ले हराउँदै स्कलर्स अन्तिम चारमा प्रवेश गर्न सफल भएको हो । यसअघि खेलाइएको ७० मिनटको निर्धारित समयको खेलमा दुवै टोलीले गोलरहित बराबरी खेलेका थिए ।

खेलमा स्कलर्स होम एकेडेमीका गोलरक्षक बिशाल सुनार म्यान अफ द म्याच घोषित भए । प्रतियोगिता अन्तरगत फागुन ६ गते मंगलबारको पहिलो सेमिफाइनल खेल सिद्धार्थ युवा क्लब र विश्व शान्ति युवा क्लबबीच हुने खेल संयोजक टिका थापाले जानकारी दिए ।

हिमालय सामुदायिक विकास केन्द्र, कञ्चन गाउँपालिका–४ रुपन्देहीको आयोजनामा जारी प्रतियोगिताको विजेताले उपाधिसहित नगद १ लाख ५१ हजार हात पार्नेछ भने उपविजेताले ८१ हजार प्राप्त गर्नेछ ।