काठमाडौं । पहिलोपटक सहभागिता जनाईरहेको नेपालले साउदी अरेबियामा जारी वाफ महिला च्याम्पियनसिपतर्फ उत्कृष्ट शुरुवात गरेको छ । समूह बी मा रहेको नेपालले मंगलबार आफ्नो पहिलो खेलमा सिरियालाई ४–१ ले हराउँदै उत्कृष्ट शुरुवात गरेको हो ।

जेद्दाह स्थित किंग अब्दुलाह स्पोर्टस सिटी स्टेडियममा भएको खेलमा नेपाल शुरुवातबाटै हावी देखियो । खेलको नवौं मिनट मै अमिषा कार्कीको गोलबाट नेपालले खेलमा अग्रता बनाएको थियो । लगतै १२औं मिनटमा अनिता बस्नेतले त्यो अग्रता दोब्बर पारिन् ।

१८औं मिनटमा साबित्रा भण्डारीले तेस्रो गोल गर्दै पहिलो हाफ मै नेपालको पकड बलियो बनाईन् । उता पहिलो हाफ कै ४३औं मिनटमा नोर मोस्तफाले सिरियाका लागि एक गोल गर्दै टोलीलाई खेलमा फर्काउने प्रयास गरे तापनि सफल हुन सकिनन् ।

खेलको ६८औं मिनटमा रेखा पौडेलले नेपालका लागि चौथो गोल गर्दै टोलीको उत्कृष्ट जित पक्का गरिन् । नेपालले आफ्नो आगामी खेल बिहीबार इराकसँग खेल्नेछ भने सोही दिन सिरियाले प्यालेस्टाइनको सामना गर्नेछ ।

समूहको शिर्ष दुई टोली सेमिफाइनलमा प्रवेश गर्नेछन् । समूह ए मा आयोजक साउदी अरेबियासँगै जोर्डन, लेबनान र गुआम रहेका छन् ।