काठमाडौं । शहिद स्मारक सी डिभिजन लिगतर्फ आइतबारदेखि शुरु भएको नवौं चरणको शुरुवाती दुई खेलहरुमा लिगलिडर आरसी३२ फुटबल एकेडेमी र झम्सीखेल युथ क्लबले जित हात पारेका छन् ।

सातदोबाटो स्थित एन्फा कम्प्लेक्स्मा भएको पहिलो खेलमा आरसी३२ ले गोलबजार स्पोर्टस क्लबलाई २–१ ले हरायो । आरसी३२ का लागि सुजन बलम्पाकी र आशिष लावतीले गोल गरे । पराजित गोलबजारका लागि भने बिनु आले मगरले गोल फर्काएका थिए ।

यो नतिजापछि ९ खेलबाट १६ अंक जोड्दै आरसी३२ शिर्ष स्थानमा उक्लिएको छ । पराजित गोलबजार भने पाँच अंकका साथ लिगतालिकाको पुछारमा छ ।

त्यस्तै अर्को खेलमा झम्सीखेलले मनोहरा युनाइटेडलाई शून्यका विरुद्ध ३ गोलले हरायो । झम्सीखेलका लागि आकाश राना, विवश लिम्बु र अरुण मेचेले गोल गरे ।

यो जितपछि ९ खेलबाट १३ अंक जोडेको झम्सीखेल छैठौं स्थानमा उक्लिएको छ । पराजित मनोहरा भने १४ अंकका साथ चौथो स्थानमा छ ।