काठमाडौं । एन्फा युथ लिग अन्तर्गत बिहीबार भएको दुई खेलहरुमा दुई विभागीय टोली एपिएफ फुटबल क्लब र नेपाल पुलिस क्लबले जित हात पारेका छन् ।

एन्फा कम्प्लेक्समा भएको पहिलो खेलमा एपिएफले सिजनको पहिलो जित दर्ता गर्ने क्रममा सातदोबाटो युथ क्लबलाई २–१ ले हरायो । एपिएफको जितमा बिकास तितुङ र किशोर गुरुङ्गले गोल गरे । सातदोबाटोका लागि योहान लिम्बुले गोल फर्काएका थिए ।

दिनको दोस्रो खेलमा लगातार दोस्रो जित हात पार्ने क्रममा पुलिसले संकटा क्लबलाई शून्यका विरुद्ध २ गोलले हरायो । पुलिसका लागि दुवै गोल रञ्जित लामाले गरे ।

लगातार दुई जित हात पारेको पुलिस लिगतालिकाको शिर्ष स्थानमा समेत छ । उता लगातार दुई खेलमा हार बेहोरेको संकटा अझै अंकविहीन छ ।

डबल राउण्ड रोबिन लिगका आधारमा हुने प्रतियोगितामा कुल १२ टोलीहरु सहभागि छन् । लिगको शिर्ष स्थान हासिल गर्ने टोली विजेता बन्नेछ । विजेताले उपाधिसहित नगद १ लाख हात पार्नेछ भने दोस्रो स्थान हासिल गर्ने टोलीले ५० हजार प्राप्त गर्नेछ ।