म्याङलुङ । तेह्रथुमको म्याङलुङमा शुक्रबार सम्पन्न प्रि-क्वाटर फाइनल खेलबाट जित निकाल्दै छथर जोरपाटी धनकुटा र बि.बि.सि. तेह्रथुम नेत्र गुरागाई स्मृति गोल्डकपको क्वाटर फाइनलमा प्रवेश गरेका छन । म्याङलुङ रंगशालामा शुक्रबार सम्पन्न पहिलो खेलमा आयोजक म्याङलुङ स्पोटिङ युवा क्लबलाई ५-० ले पराजित गर्दै छथर जोरपाटी धनकुटा क्वाटर फाइनल प्रवेश गरेको हो । धनकुटाको जितका लागि मिक्सन दाशले चार गोल गरे भने मनकुमार राईले एक गोल गरे ।

त्यस्तै शुक्रबार नै सम्पन्न दोस्रो खेलमा मादी नगरपालिका संखुवासभालाई ट्राइवेकरमा पराजित गर्दै बि.बि.सि. तेह्रथुम क्वाटर फाइनलमा प्रवेश गरेको छ ।निर्धारित समयमा दुबै टिमबाट गोल हुन नसके पछि नतिजा ट्राइवेकर मार्फत निकालिएको थियो । ट्राईवेकरमा मादीलाई ४-३ गोलले पराजित गर्दै बि.बि.सि. क्वाटरफाइनल प्रवेश गरेको हो ।

लाखेजात्रा तथा श्रीकृष्ण जन्माष्टमीको अवसरमा म्याङलुङ रंगशालामा विगत वर्षहरूमा झै यो वर्ष पनि प्रतियोगिता सन्चालन गरिएको म्याङलुङ स्पोटिङ क्लबका अध्यक्ष प्रविन मोतेले जानकारी दिनुभयो । भदौ १५ गते सम्म सन्चालन हुने प्रतियोगितामा विजेताले २ लाख सहीत ट्रफि र उपविजेताले १ लाख प्राप्त गर्ने अध्यक्ष मोतेले बताउँनुभयो ।

त्यसैगरी वेष्ट किपर,वेस्ट प्लेयर,वेस्ट डिफेन्डर, हाई स्कोरर र उदयमान खेलाडीलाई उचित पुरस्कारले पुरस्कृत गरिने खेल संयोजक राजहाङ पीरती सुब्बाले बताउँनुभयो ।

भदौ ८ गते शनिबार पनि दुइ खेल सन्चालन हुने आयोजकले जानकारी दिएको छ । पहिलो खेल दिउँसो १२ बजे फेदाप गाउँपालिका तेह्रथुम र कुम्मायक गाउँपालिका पॉचथर बिच हुनेछ । दोस्रो खेल दिउँसो २ बजे चौतारी vs सप्तरी बिच हुने बताइएको छ ।