कावासोती । सहज जितका साथ एभरेष्ट क्लब यहाँ जारी ३८औं युनाइटेड गोल्डकप खुला नकआउट फुटबल प्रतियोगिताको सेमिफाइनलमा प्रवेश गर्ने अन्तिम टोली बनेको छ ।

मंगलबार भएको चौथो क्वाटरफाइनलमा एभरेष्टले दुम्कीबास युथ क्लबलाई शून्यका विरुद्ध ४ गोलले हराउँदै अन्तिम चारमा प्रवेश गरेको हो ।

एभरेष्टको जितमा समिर श्रेष्ठले ह्याट्रिक गरे भने थप एक गोल भुपेश मगरले गरेका थिए । एभरेष्टले अब दोस्रो सेमिफाइनलतर्फ वातासिनो योङ स्टार युथ क्लबसँग खेल्नेछ ।

प्रतियोगिता अन्तर्गत भदौ २६ गते बुधबारको पहिलो सेमिफाइनल खेल रडस रामपुर र भेडाबारी एफसी बीच हुने आयोजकले जानकारी दियो ।

युनाइटेड युवा क्लब, गिरुबारीको आयोजनामा जारी प्रतियोगिताको विजेताले उपाधिसहित नगद २ लाख ५० हजार हात पार्नेछ भने उपविजेताले १ लाख ५० हजार हात पार्नेछ । फाइनल खेल भदौ २९ गतेका दिन हुनेछ ।