काठमाडौं । नेपाली राष्ट्रिय फुटबल टोलीको प्रशिक्षकीय जिम्मेवारीका लागि अनुभवी मानिएका पोर्चुगिज प्रशिक्षक आरलेसियो मानुएल पायर्स कोएल्होले पनि आवेदन दिएका छन् । न्युजअफनेपालमा प्रकाशित खबर अनुसार ४८ वर्षिय आरलेसियो नेपाली टोलीको प्रशिक्षक बन्न इच्छुक देखिएका हुन् ।

युइएफए प्रो लाइसेन्स प्रशिक्षक समेत रहेका आरलेसियोले आफ्नो व्यवसायिक करियरमा पोर्चुगल, फ्रान्स, ग्रीस, साउदी अरेबिया जस्ता देशहरुमा त्यहाँका व्यवसायीक क्लबहरुको प्रशिक्षक तथा प्राविधिक निर्देशकका रुपमा काम गरिसकेको अनुभव पनि छ ।

यद्यपि उनले राष्ट्रिय टोलीको प्रशिक्षकीय जिम्मेवारी भने अहिलेसम्म ननिभएको बताइएको छ । उनले नेपाली टोलीको जिम्मेवारी सम्हाल्न पाए, नेपाली फुटबलको स्तरलाई अर्को उचाईंमा लैजान सक्ने विश्वस व्यक्त गरेका छन् ।

आरलेसियो बाहेक अष्ट्रेलियाका इयान एन्ड्रयु गिलानले पनि नेपाली राष्ट्रिय फुटबल टोलीको प्रशिक्षक बन्न आवेदन दिएका छन् । गिलान पनि युइएफए प्रो लाइसेन्स प्रशिक्षक हुन् । उनीसँग अष्टेलिया, स्क्टल्याण्डका साथै एसियाली फुटबलमा काम गरेको अनुभव पनि छ । उनलाई गत सिजन नेपाल सुपर लिग क्लब ललितपुर सिटीले मुख्य प्रशिक्षकमा अनुवन्ध समेत गरेको थियो । साथै उनले ललितपुरलाई लिग उपाधि समेत जिताएका थिए ।