पथलैया । रामवन कुनाटोल क्लबले दोस्रो पथलैया नकआउट फूटबल प्रतियोगिताको उपाधी उचालेको छ । पथलैयास्थित गैरी खेल मैदानमा शनिबार सम्पन्न फाइनल खेलमा चकरी फूटबल क्लबलाई १-० ले पराजित गर्दै रामवनले उपाधी उचालेको हो ।

रामवनलाई उपाधि दिलाउन रिकेश मगरले निर्णायक गोल गरेका थिए । उपाधीसंगै रामवनले २५ हजार र उपविजेता चकरीले १५ हजार हात पारेको छ ।

प्रतियोगिताको प्लेयर अफ दि टुर्नामेन्ट चकरीका मनिष क्षेत्री घोषित भए । यसैगरी उत्कृष्ट गोलरक्षक रामवनका विशाल लामा घोषित भएका छन् ।

प्रतियोगिताको विजेता र उपविजेता टिमका खेलाडीलाई जीतपुरसिमरा उपमहानगरपालिका वडा नं. १ का वडाध्यक्ष हिराबहादुर गुरुङ, वडासदस्य राकेश सुब्बा, नेपाल राष्ट्रिय माध्यमिक विद्यालय व्यवस्थापन समितिका अध्यक्ष कल्याण आले, प्रतियोगिता संयोजक नवराज अधिकारीलगायतले पुरस्कार वितरण गरेका थिए ।

पथलैया दिव्य ज्योती क्लबको आयोजनमा मंसिर २२ गतेदेखी सुरु भएको प्रतियोगितामा १७ टिमको सहभागिता रहेको थियो ।

मैत्रीपूर्ण महिला फूटबलमा आयोजक विजयी

त्यसैगरी पथलैया नकआउट फूटबल प्रतियोगिताको फाइनल समारोहको अवसर पारेर आयोजना गरिएको मैत्रीपूर्ण महिला फूटबलमा दिव्य ज्योती क्लब विजयी भएको छ । दिव्य ज्योतीले एनजेजेभिसी सिमरालाई २-० ले पराजित गरेको हो ।