काठमाडौं (एजेन्सी) । फ्रान्समा जारी ओलम्पिक गेम्सको महिला फुटबलतर्फ चार बलिया टोलीहरु अमेरिका, स्पेन, जर्मनी र ब्राजील सेमिफाइनलमा प्रवेश गरेका छन् ।

पेरिसमा भएको पहिलो क्वाटरफाइनलमा अमेरिकाले जापानलाई शून्यका विरुद्ध १ गोलले हरायो । दोस्रो क्वाटरफाइनलमा स्पेनले कोलम्बियालाई टाईब्रेकरमा ४–२ ले निराश तुल्यो । त्यसअघि निर्धारित समयको खेल दुवै टोलीले २–२ गोलको बराबरी खेलेका थिए ।

त्यस्तै तेस्रो क्वाटरफाइनलमा जर्मनीले क्यानडामाथि टाईब्रेकरमा ४–२ को जित निकाल्यो । त्यसअघि दुवै टोलीले निर्धारित समयको खेल गोलरहित बराबरी खेलेका थिए । चौथो क्वाटरफाइनलमा भने ब्राजीलले आयोजक फ्रान्सलाई १–० ले हराउँदै अन्तिम चारको यात्रा तय गर्यो ।

सेमिफाइनल समिकरण पनि पूरा

क्वाटरफाइनलका सबै खेलहरु सम्पन्न भएसँगै महिला ओलम्पिक फुटबलतर्फ सेमिफाइनल समिकरण पनि पूरा भएको छ । अब ६ अगस्तका दिन हुने दुई सेमिफाइनलतर्फ पहिलो सेमिफाइनलमा अमेरिका र जर्मनी भिड्ने छन् भने दोस्रो सेमिफाइनलमा स्पेन र ब्राजील भिड्ने छन् ।