बेलबारी । आयोजक पुष्पाञ्जली फुटबल क्लब, बेलबारी यहाँ जारी तेस्रो पुष्पाञ्जली कप खुला नकआउट फुटबल प्रतियोगिताको फाइनलमा प्रवेश गरेको छ ।

आइतबार भएको दोस्रो सेमिफाइनलतर्फ पुष्पाञ्जलीले जुडी फुटबल क्लबलाई १–० ले हराउँदै फाइनल प्रवेश गरेको हो । पुष्पाञ्जलीको जितमा खेलको २७औं मिनटमा सबिन राईले एक मात्र निर्णायक गोल गरे । खेलको म्यान अफ दि म्याच भने उमेश कार्की घोषित भए ।

अब यही पुष २९ गते हुने फाइनलमा आयोजक पुष्पाञ्जलीले बिएम फुटबल एकेडेमीसँग उपाधिका लागि प्रतिस्पर्धा गर्नेछ ।

पुष्पाञ्जली फुटबल क्लब, बेलबारी, मोरङको आयोजनामा जारी प्रतियोगिताको विजेताले उपाधिसहित नगद १ लाख १ हजार हात पार्नेछ भने उपविजेताले ५१ हजारसहित ट्रफी, मेडल र प्रमाणपत्र प्राप्त गर्नेछ ।