News आर्मी लगातार दोस्रोपटक मकवानपुर गोल्डकपको फाइनलमा
बिक्रम बानियाँ क्षेत्री

हेटौडा । साविक विजेता त्रिभुवन आर्मी फुटबल क्लब यहाँ जारी स्थानीय तह शहिद स्मृति चौथो मकवानपुर गोल्डकप फुटबल प्रतियोगिताको फाइनलमा प्रवेश गरेको छ ।

शनिबार सम्पन्न प्रतियोगिताको दोस्रो सेमिफाइनलमा आर्मीले एभनिर एफसी, क्यामरुनलाई पेनाल्टी शुटआउटमा ११–१० ले हरायो । त्यसअघि पिप्ले रंगशालामा सम्पन्न निर्धारित समयको खेल दुवै टोलीले १–१ को बराबरी खेलेका थिए ।

दोस्रो हाफको शुरुवाततिर दिनेश हेन्जनको गोलबाट अग्रता लिएको आर्मीले त्यो अग्रतालाई अन्तिम समयमा गुमाउन पुग्यो । अन्तिमतिर इन्जुरी समयमा एभनिरका लागि डिजिकाले गोल गर्दै खेललाई रोमाञ्चक बराबरीमा ल्याएका थिए ।

पेनाल्टी शुटआउटमा दुवै पक्षबाट १४–१४ पेनाल्टी प्रहार भएका थिए । जसमा अन्ततः आर्मीले नतिजा आफ्नो पक्षमा पार्न सफल भयो । खेलमा आर्मीका दिनेश हेन्जन म्यान अफ द म्याच घोषित भए । उनले पुरस्कार वापत नगद १० हजार हात पारे ।

आर्मीले अब फाइनलमा जेठ ३० गते सोमबारका दिन घरेलु टोली विजय युथ क्लब, हेटौडाको सामना गर्नेछ । मकवानपुर जिल्ला फुटबल संघको आयोजनामा जारी प्रतियोगिताको विजेताले उपाधिसहित नगद १५ लाख हात पार्नेछ भने उपविजेताले १० लाख प्राप्त गर्नेछ ।

Post Comments