इटहरी । संघर्षपुर्ण जितका साथ युनाइटेड क्लब अफ तरहरा यहाँ जारी तेस्रो मनसुन कप नकआउट फुटबल प्रतियोगिताको सेमिफाइनलमा प्रवेश गरेको छ । बुधबार भएको पहिलो क्वाटरफाइनलतर्फ युनाइटेडले जहदा फुटबल क्लब, मोरङलाई टाईब्रेकरमा हराउँदै अन्तिम चारमा प्रवेश गरेको हो ।

बुढासुब्बा खेलमैदानमा भएको निर्धारित समयको खेल गोलरहित बराबरीमा टुंगिएपछि खेलको निर्णय टाईब्रेकरबाट लिइएको थियो । टाईब्रेकरमा युनाइटेडले जहदामाथि ५–३ को जित निकाल्दै सेमिफाइनल यात्रा पक्का गर्न सफल भएको हो ।

खेलमा युनाइटेड क्लबका योगेन्द्र कार्की म्यान अफ द म्याच घोषित भए । उनले पुरस्कार वापत नगद १ हजार र ट्रफी हात पारे । प्रतियोगिता अन्तरगत साउन ४ गते बिहीबारको दोस्रो क्वाटरफाइनल खेल आयोजक शान्तिनगर फुटबल क्लब (बी) र इनरुवा इभेन्ट म्यानेजमेन्टबीच हुने आयोजकले जानकारी दियो ।

शान्तिनगर फुटबल क्लब, इटहरीको आयोजनामा जारी प्रतियोगिताको विजेताले उपाधिसहित नगद ३५ हजार हात पार्नेछ भने उपविजेताले २० हजार प्राप्त गर्नेछ । फाइनल खेल यही साउन ११ गतेका दिन हुनेछ ।