काठमाडौं । विश्व फुटबलको सर्वोच्च संस्था फिफाले निकालेको ताजा वरियतामा नेपाली महिला फुटबल टोलीको वरियता यथावत रहेको छ । फिफाले शुक्रबार निकालेको अगस्त महिनाको ताजा वरियता अनुसार नेपाल १०१औं स्थानमा यथावत रहेको छ । दक्षिण एसियातर्फ भने नेपाल दोस्रो स्थानमा छ ।

त्यस्तै फिफा वरियतामा एक स्थान तल खस्किएको भारत ६१औं स्थानमा छ र दक्षिण एसियातर्फ शिर्ष स्थान मै कायम छ । त्यस्तै १४२औं स्थानमा झरेको बंगलादेश दक्षिण एसियातर्फ तेस्रो स्थानमा छ । १५३औं स्थानमा रहेको श्रीलंका भने दक्षिण एसियातर्फ चौथो स्थानमा छ ।

त्यसैगरी १५७औं स्थानमा रहेको पाकिस्तान दक्षिण एसियातर्फ पाँचौं स्थानमा छ भने १६०औं स्थानमा रहेको माल्दिभ्स र १६९औं स्थानमा रहेको भुटान दक्षिण एसियातर्फ क्रमशः छैठौं र सातौं स्थानमा रहेका छन् ।

एसियातर्फ शिर्ष स्थानमा भने विश्व वरियताको आठौं स्थानमा रहेको जापान छ । ११औं स्थानमा रहेको अष्ट्रेलिया एसियातर्फ दोस्रो स्थानमा छ भने १५औं स्थानमा रहेको चीन एसियाली वरियतातर्फ तेस्रो स्थानमा छ ।

त्यसैगरी विश्व वरियताको शिर्ष स्थानमा भने स्वीडेन छ । भर्खरै विश्व च्याम्पियन बनेको स्पेन दोस्रो स्थानमा रहँदा अमेरिका विश्व वरियताको तेस्रो स्थानमा छ ।