काठमाडौं । सन् २०३४ को फिफा विश्वकप आयोजनाका लागि साउदी अरेबियाले पनि फिफा समक्ष प्रस्ताव गरेपछि अहिले यो कुराले पनि विश्व फुटबलमा चर्चा पाईरहेको छ ।

साउदीले गत साता मात्रै विश्व फुटबलको सर्वाधिक ठूलो र प्रतिष्ठित प्रतियोगिता आयोजना गर्न विश्व फुटबलको नियमनकारी निकाय फिफा समक्ष आधिकारिक रुपमा प्रस्ताव पेश गरेको थियो ।

साउदीको यही प्रस्तावलाई अखिल नेपाल फुटबल संघ (एन्फा) ले पनि समर्थन गरेको छ । साउदी र नेपाल बीचको सम्बन्ध विविध कारणले पनि विशेष र प्रगाढ रहेको चर्चा गर्दै एन्फाले सन् २०३४ को फिफा विश्वकप आयोजना अधिकार साउदीले पाउनु पर्नेमा आफूहरुको पनि समर्थन रहेको जनाएको छ ।

स्मरण रहोस, गत वर्ष मात्र अर्को एसियाली राष्ट्र कतारले फिफा विश्वकपको २२औं संस्करण भव्यताका साथ सम्पन्न गरिसकेको छ । यद्यपि कतार विश्वकप इतिहास मै पहिलोपटक जाडो मौसममा आयोजना गरिएको थियो ।

साउदी अरबले भने कतार विश्वकप अघिको संस्करणहरुमा झैं गर्मी महिना मै विश्वकप आयोजना गर्न तयार रहेको बताएको छ । विश्वकप आयोजनाबारे साउदीको यो प्रस्तावलाई एसियाली फुटबल महासंघ (एएफसी) का अध्यक्ष शेख सलमान बिन इब्राहिम अल खलिफाले पनि समर्थन गरेका छन् ।

त्यसो त, साउदीको यो प्रस्तावलाई डोमिनिक रिपब्लिक, ग्वाटेमाला, पनामा, फिलिपिन्स लगायत अन्य थुप्रै फिफा सदस्य राष्ट्रहरुले समर्थन गरिरहेका छन् ।