काठमाडौं । दोस्रो केपी ओली कप अन्तर्राष्ट्रिय आमन्त्रण नकआउट फुटबल प्रतियोगिताको उपाधि मच्छिन्द्र फुटबल क्लबले जितेको छ । शनिबार भएको फाइनलमा मच्छिन्द्रले नयुरोडटिम (एनआरटी) लाई टाईब्रेकरमा हराउँदै उपाधि उचाल्न सफल भएको हो ।

त्यसअघि दशरथ रंगशालामा भएको निर्धारित समयको प्रतिस्पर्धात्मक खेल दुवै टोलीले गोलरहित बराबरी खेलेका थिए । टाईब्रेकरमा भने मच्छिन्द्रले एनआरटीमाथि ५–४ को जित निकाल्दै च्याम्पियन बन्न सफल भयो । विजेता बनेको मच्छिन्द्रले उपाधिसहित नगद ११ लाख हात पारेकोछ भने उपविजेता एनआरटीले ५ लाखमा चित्त बुझाएको छ ।

राष्ट्रिय युवा संघ नेपालको आयोजनामा फागुन ११ गतेदेखि शुरु भएको प्रतियोगितामा नेपाल र भारतका गरी कुल १० टोलीहरुले सहभागिता जनाएका थिए ।