काठमाडौं (एजेन्सी) । महत्वपूर्ण र निर्णायक मानिएको खेलमा सनसनीपूर्ण जित निकाल्दै अफ्रिकी राष्ट्र इजिप्ट जारी ओलम्पिक गेम्सको पुरुष फुटबलतर्फ समूह सी बाट क्वाटरफाइनलमा प्रवेश गरेको छ ।

मंगलबार बोर्डेक्समा भएको समूह चरणको अन्तिम खेलमा यसअघि नै नकआउट चरणमा प्रवेश गरिसकेको स्पेनलाई इजिप्टले १–२ ले स्तब्ध पार्यो । सोही समूहको अर्को खेलमा डोमिनिकन रिपब्लिक र उज्वेकिस्तानले १–१ गोलको बराबरी खेले ।

यो नतिजापछि ३ खेलबाट ७ अंक जोडेको इजिप्ट समूह विजेताका रुपमा क्वाटरफाइनलमा प्रवेश गर्यो । त्यस्तै ६ अंक जोडेको स्पेन समूह उपविजेताका रुपमा क्वाटरफाइनलमा प्रवेश गर्यो । उता २ र १ अंक जोडेका क्रमशः डोमिनिकन रिपब्लिक र उज्वेकिस्तान भने समूह चरणबाटै बाहिरिए ।