काठमाडौं । पारो फुटबल क्लबका लागि एएफसी च्यालेञ्ज लिग खेल्न जापानी स्टार केइसुके होण्डा भुटान आइपुगेका छन् । पारोले गत साता मात्रै एएफसी च्यालेञ्ज लिगका लागि होण्डालाई अनुवन्ध गरेको कुरा घोषणा गरेको थियो ।

भुटान आइपुगेका होण्डालाई भुटान फुटबल फेडरेशन र पारो एफसीका पदाधिकारीहरुले स्वागत गरेका थिए । होण्डाले सोमबार नै थिम्पु स्थित चाङलिमिथाङ स्टेडियममा भुटान यु–२० फुटबल टोलीसँग हुने प्रदर्शनी खेल पनि खेल्ने बताइएको छ ।

स्मरण रहोस, भुटानको लिग च्याम्पियन पारोले एएफसी च्यालेञ्ज लिगको प्रारम्भिक चरणको छनौट खेलतर्फ यही आउँदो अगस्त १३ तारीखका दिन नेपालको लिग च्याम्पियन चर्च ब्वाईज युनाइटेडसँग खेल्ने कार्यक्रम छ । जुन खेल काठमाडौं स्थित दशरथ रंगशालामा हुनेछ ।