जितपुरसिमरा । यहाँ जारी चौथो जितपुरसिमरा भेट्रान्स कप अन्तर्राष्ट्रिय आमन्त्रण नकआउट फुटबल प्रतियोगिताको फाइनलमा घरेलु टोली सिमरा भेट्रान्स, सिमरा र सरस्वतीनगर भेट्रान्स, काठमाडौं भिड्ने भएका छन् ।

शुक्रबार भएको पहिलो सेमिफाइनलतर्फ सिमराले क्लाईभ हाउस भेट्रान्स, कोलकातालाई शून्यका विरुद्ध २ गोलले हरायो । सिमरा भेट्रान्सका लागि दुवै गोल रमेश गुरुङले गर्दै घरेलु टोलीको जितमा निर्णायक भूमिका खेले ।

त्यस्तै दोस्रो सेमिफाइनलमा सरस्वतीनगर भेट्रान्सले एबिसी भेट्रान्स, पोखरालाई टाईब्रेकरमा हराउँदै फाइनलमा प्रवेश गरेको हो । निर्धारित समयको खेल गोलरहित बराबरीमा टुंगिएपछि टाईब्रेकरमा सरस्वतीनगर भेट्रान्सले एबिसीमाथि ४–२ को जित निकाल्दै फाइनल स्थान पक्का गर्यो ।

फाइनल खेल यही असोज ५ गते शनिबारका दिन सिमरा भेट्रान्स र सरस्वतीनगर भेट्रान्स बीच हुने आयोजकले जानकारी दियो । प्रतियोगिताको विजेताले उपाधिसहित नगद ३ लाख हात पार्नेछ भने उपविजेताले १ लाख ५० हजार प्राप्त गर्नेछ ।