काठमाडौं । नवौं बुढानिलकण्ठ नगर कप नकआउट फुटबल प्रतियोगिताको फाइनलमा शिवपुरी नवजागृत युवा क्लब र शिवपुरी युवा क्लब उपाधिका लागि भिड्ने भएका छन् ।

बुढानिलकण्ठ स्कुलको खेलमैदानमा भएको पहिलो सेमिफाइनलमा शिवपुरी नवजागृतले रिभरसाईड क्लबलाई ३–० ले हरायो । दुई टोलीबीचको प्रतिस्पर्धात्मक खेल १–१ को बराबरीमा जारी रहँदा असन्तुष्टी जनाउँदै रिभरसाइडका खेलाडीहरुले मैदान छाडेका थिए ।

नियमानुसार रिभरसाईडका खेलाडीहरुलाई पूनः मैदानमा प्रवेश नगरेपछि आयोजकले शिवपुरी नवजागृतलाई ३–० को नतिजाले विजयी घोषणा गरेको थियो ।

त्यस्तै दोस्रो सेमिफाइनलमा शिवपुरी युवा क्लबले बुढानिलकण्ठ वार्ड नम्बर ९ लाई शून्यका विरुद्ध १ गोलले हराउँदै फाइनल प्रवेश गर्यो । शिवपुरीको जितमा एरिक बिष्टले एक मात्र निर्णायक गोल गरे ।

विजयादशमीको अवसर पारी बुढानिलकण्ठ युवा समाजले आयोजना गरेको प्रतियोगिताको विजेताले उपाधिसहित नगद १,११,१११ रुपैयाँ हात पार्नेछ भने उपविजेताले ५५,५५५ रुपैयाँसहित ट्रफी, मेडल र प्रमाणपत्र प्राप्त गर्नेछ । फाइनल खेल असोज २५ गतेका दिन हुनेछ ।