सुपौली । बुटवल लुम्बिनी फुटबल क्लब र बुटवल लुम्बिनी फुटबल एकेडेमीको आयोजना तथा समपुर्ण युवा क्लब, सुपौलीको संयोजनमा सम्पन्न युथ फुटबल प्रतियोगिताको उपाधि बुटवल लुम्बिनी एफए (हरियो) ले जितेको छ ।

तिलोत्तमा नगरपालिकाको सुपौली स्थित समपुर्ण खेलमैदानमा भएको फाइनलमा बुटवल लुम्बिनी एफए (हरियो) द्वारा बुटवल लुम्बिनी एफए (रातो) १–० ले पराजित । हरियो टिमको जितमा सोयम बुढा मगरले एक मात्र निर्णायक गोल गरे ।

विजेता तथा उपविजेता टोलीका खेलाडीहरुलाई बुटवल लुम्बिनी फुटबल एकेडेमीका अध्यक्ष असिम भट्टराई, वरिष्ठ फुटबल प्रशिक्षक यम प्रसाद गुरुङ, समपुर्ण युवा क्लब, सुपौलीका अध्यक्ष अबिर पुन, संरक्षक तथा पूर्व खेलाडी अशोक पुन लगायतले पुरस्कृत गरेका थिए ।

रुपन्देही भित्र आफू मातहत रहेर फुटबल एकेडेमी सञ्चालन गर्ने उद्देश्यका साथ हाल बुटवल लुम्बिनी फुटबल क्लबले जिल्लाका चार फरक स्थानहरुमा फुटबल प्रशिक्षण सञ्चालन गरिरहेको एकेडेमीका अध्यक्ष असिम भट्टराई बताए । साथै साना खेलाडीहरुको खेल क्षमतालाई अझै अभिवृद्धि गर्न केही महिना भित्रै युथ लिग सञ्चालन गर्ने जानकारी समेत दिए ।