बेलबारी । सातौं बेलबारी आरजु राईस गोल्डकप अन्तर्राष्ट्रिय आमन्त्रण नकआउट फुटबल प्रतियोगिताको फाइनलमा आज सलहेश युवा क्लब, सिराहा र झापा-११ फुटबल क्लब, झापा उपाधिका लागि भिड्दैछन ।

दोस्रो सेमिफाइनलतर्फ सलहेशले चितलाङ फुटबल क्लब, काठमाडौलाई ५-१ को अन्तरले हराउँदै फाइनलमा झापासँगको भेट पक्का गरेको हो ।

सलहेशको जितमा अजयी मार्टिन्सले ह्याट्रीक गर्दा थप दुई गोल आदित्य शाक्यले गरे । उता पराजित चितलाङका लागि भने हेनरीले एक मात्र गोल गरेका थिए । खेलमा ह्याट्रीककर्ता सलहेशका मार्टिन्स खेलको म्यान अफ दि म्याच पनि चुनिए ।

एलएक्स सिटी फुटबल क्लब, बेलबारी, मोरङको आयोजनामा जारी प्रतियोगिताको विजेताले उपाधिसहित नगद ८ लाख हात पार्नेछ भने उपविजेताले ४ लाखसहित ट्रफी, मेडल र प्रमाणपत्र प्राप्त गर्नेछ ।