सुन्दरहरैचा । यहाँ सम्पन्न स्व. दिपेश स्मृति चौथो सुकुना च्यालेञ्ज कप खुला नकआउट फुटबल प्रतियोगिताको उपाधि आरएफसी धरानले उचालेको छ ।

शनिबार सम्पन्न फाइनलमा आरएफसीले इन्ट्रान पथरी–११ फुटबल क्लबलाई शून्यका विरुद्ध २ गोलले हराउँदै उपाधि जित्न सफल भएको हो । आरएफसीको जितमा दुवै गोल मिलन लिम्बुले गरे ।

विजेता बनेको आरएफसीले उपाधिसहित नगद १ लाख हात पार्यो भने उपविजेता पथरीले ५१ हजारसहित ट्रफी, मेडल र प्रमाणपत्रमा चित्त बुझायो । आरएफसीका बिकु राई फाइनल खेलको म्यान अफ दि म्याच बने ।

अन्य विधागतर्फ उत्कृष्ट गोलरक्षक आरएफसीका पूर्ण चेम्जोङ बन्दा उत्कृष्ट डिफेन्डरी पथरीका मिन धिमाल चुनिए । उत्कृष्ट मिडफिल्डर पनि पथरी कै सञ्जय लिम्बु बन्दा उत्कृष्ट फरवार्ड आरएफसीका तपन कार्की बने ।

त्यस्तै सर्वाधिक गोलकर्ताको पुरस्कार आरएफसीका मिलन लिम्बुले हात पार्दा उदीयमान खेलाडी आयोजक क्लबका यायाहाङ लिम्बु चुनिए । प्रतियोगिता कै सर्वोत्कृष्ट खेलाडी भने दोर्जे तामाङ घोषित भए ।

खोर्साने सामुदायिक विकास केन्द्र, सुन्दरहरैचा–१२, खोर्साने मोरङको आयोजनामा मंसिर ८ गतेदेखि शुरु भएको प्रतियोगितामा कुल आठ टोलीहरुले सहभागिता जनाएका थिए ।