पॉचथरको सदरमुकाम फिदिममा जारी ११ औँ फाल्गुनन्द गोल्डकपमा बिराटनगर सिटि फुटबल क्लबलाई ७-१ को फराकिलो अन्तरले पराजित गर्दै चिरच ब्वाइज युनाइटेड सेमिफाइनल प्रवेश गरेको छ ।

फिदिम मा.वि.को खेल मैदानमा बुधबार सम्पन्न तेस्रो क्वाटर फाइनलमा चर्च व्वाइजको जितका लागि समीर तामाङ र विदेशी खेलाडी अरमान्डले ह्याट्रिक गरे भने फोफोनाले एक गोल गरे । बिराटनगर सिटि एफसीका लागि सुमन चौलागाईले सान्त्वना गोल गरे ।

अब चर्च ब्वाईजले पुस १२ गते पहिलो सेमिफाइनलमा आयोजक फिदिम स्पोर्टिङ क्लबसंग खेल्नेछ । खेलको प्लेयर अफ दि म्याच चर्च ब्वाइजका समिर तामाङ घोषित हुँदै नगद दश हजार प्राप्त गरे ।

फाल्गुनन्द गोल्डकपको छैटौ दिन पुस ११ गते बिहीबार अन्तिम क्वाटर फाइनलमा न्यू रोड टीम एन आर टी र सहलेस युवा क्लब भिड्नेछन ।

पुस ६ गते देखि सुरू भएको गोल्डकपको फाइनल पुस १५ गते हुनेछ । दश टिम सहभागी रहेको गोल्डकपको विजेताले १० लाख ५ सय ५५ र उपविजेताले ५ लाख ५ सय ५५ प्राप्त गर्नेछ । फिदिम नगरपालिका प्रवद्धक रहेको गोल्डकपको आयोजना फिदिम स्पोर्टिङ क्लबले गरेको हो ।