पिलुवा डगाह । बिरगन्ज युनाइटेड एफसीको आयोजनामा पिलुवा डगाहमा बालक तथा बालिकालाई लक्षित ग्रासरुट्स फुटबल कार्यक्रम उत्साहजनक रूपमा सञ्चालन भइरहेको छ। आईतवारबाट सञ्चालनमा आएको कार्यक्रममा स्थानीय बालबालिकाले आधारभूत फुटबल सीप, अनुशासन, टोली भावना र खेल संस्कृतिबारे प्रशिक्षण प्राप्त गरिरहेका छन्।

यस कार्यक्रमले गाउँस्तरमा लुकेका प्रतिभावान खेलाडीको पहिचान र विकासमा टेवा पुर्‍याउने विश्वास गरिएको छ। प्रशिक्षक मुन्ना चौधरीको प्रत्यक्ष निगरानीमा भइरहेको प्रशिक्षणमा अभिभावक र स्थानीय समुदायको पनि उल्लेखनीय साथ र सहयोग रहेको छ। बिरगन्ज युनाइटेडले यस्ता ग्रासरुट्स कार्यक्रममार्फत नेपाली फुटबलको उज्ज्वल भविष्य निर्माण गर्ने लक्ष्य राखेको छ।