काठमाडौं । पहिलोपटक एन्फा महिला लिग राष्ट्रिय फुटबल प्रतियोगितामा सहभागिता जनाईरहेको संकटा क्लबले सिजनको पहिलो खेलमा खराब शुरुवात गरेको छ ।

बुधबार एन्फा कम्प्लेक्समा भएको एक मात्र खेलमा संकटाले दावेदार मध्ये एक मानिएको त्रिभुवन आर्मी फुटबल क्लबसँग ०–४ ले निरीह बन्न पुगेको हो । आर्मीको जितमा बिमला चौधरीले दुई गोल गर्दा साबित्रीदेवी मगर र अनिता लम्जेलले एक–एक गोल गरे ।

उता पुरुष फुटबलमा आफ्नो उपस्थितिलाई बलियो रुपमा पेश गर्दै आएको संकटाले महिला फुटबलमा भने त्यो वर्चश्वलाई कायम राख्न सकेन ।

कुल १० टोलीहरु सहभागि लिग विजेताले उपाधिसहित नगद १० लाख हात पार्नेछ भने उपविजेताले ५ लाख प्राप्त गर्नेछ । त्यस्तै विधागततर्फ पनि आकर्षक नगद पुरस्कारको व्यवस्था गरिएको छ ।