काठमाडौं । साफ यु–१७ महिला च्याम्पियनसिपतर्फ दावेदार मध्ये एक भारतले आफ्नो शतप्रतिशत जितको लयलाई चौथो खेलसम्म कायम राखेको छ । भारतले आफ्नो दोस्रो लेगको पहिलो खेलमा बुधबार आयोजक भुटानलाई ५–० ले हरायो ।

भारतले पहिलो लेगको खेलमा पनि भुटानलाई ८–० ले हराएको थियो । प्रतियोगितामा हाल भारत एक्लो अपराजित टोली समेत हो । यो जितपछि ४ खेलबाट १२ अंक जोडेको भारत समूहको शिर्ष स्थान मै छ ।

९ अंक जोडेको बंगलादेश दोस्रो स्थानमा छ । बुधबार नै भएको पहिलो खेलमा बंगलादेशले नेपाललाई ३–१ ले हराएको थियो । त्यस्तै ३ अंक जोडेको नेपाल तेस्रो स्थानमा रहँदा अंकविहीन भुटान पुछारमा छ ।

भारतले अब २९ अगस्त शुक्रबारका दिन नेपालको सामना गर्नेछ भने सोही दिन बंगलादेशले भुटानसँग खेल्नेछ । डबल राउण्ड रोबिन लिगका आधारमा जारी प्रतियोगिताको शिर्ष टोली विजेता बन्नेछ ।