काठमाडौं । गत साता आफ्नो पहिलो खेलमा बाली युनाइटेडसँग पराजित हुन पुगेको रोहित चन्दको टोली पेर्सिक केदिरीले नयाँ सिजनको दोस्रो खेलमा महत्वपूर्ण जित हात पारेको छ ।

सोमबार भएको खेलमा पेर्सिकले पिएसएस स्लेमानलाई शून्यका विरुद्ध २ गोलले हराउँदै पहिलो र महत्वपूर्ण जित हात पार्न सफल भएको हो । पेर्सिकका लागि अर्जेन्टिनी फरवार्ड रामिरो फेर्गोन्जी र मोहम्मद सुप्रिदीले गोल गरे ।

खेलमा रोहितले भने पहिलो रोजाईमा रहेर खेल्ने अवसर पाएनन् । उनी दोस्रो हाफको ६१औं मिनटमा उस्माने फानेको स्थानमा मैदानमा प्रवेश गरेका थिए । रोहित मैदान प्रवेश गरे लगतै पेर्सिकका लागि मोहम्मदले दोस्रो गोल गरेका थिए ।

यो जितपछि २ खेलबाट ३ अंक जोडेको पेर्सिक लिगतालिकाको आठौं स्थानमा छ । पेर्सिकले आफ्नो आगामी खेल आउँदो आइतबार मालुत युनाइटेडसँग खेल्नेछ ।