काठमाडौ । बिहीबारदेखि शुरु सहिद स्मारक सी डिभिजन लिगतर्फ आरसी३२ फुटबल क्लब, सुर्खेतले विजयी शुरुवात गरेको छ ।

उद्घाटन खेलमा आरसी३२ ले खालीबारी फुटबल क्लबलाई शुन्यका विरुद्ध १ गोलको झिनो अन्तरले हराउँदै विजयी शुरुवात गरेको हो ।

एन्फा कम्प्लेक्समा भएको खेलमा आरसी३२ का लागि बबिन बोहराले एक मात्र निर्णायक गोल गर्दै टोलीलाई महत्त्वपूर्ण तीन अंक दिलाए । खेलमा आरसी३२ का आशिष् लावती म्यान अफ द म्याच घोषित भए ।

अखिल नेपाल फुटबल संघ (एन्फा) को आयोजनामा शुरु प्रतियोगिताको विजेताले उपाधी सहित नगद १० लाख हात पार्नेछ भने दोस्रो स्थान हासिल गर्नेले ७ लाख प्राप्त गर्नेछ । त्यस्तै तेस्रो स्थान हासिल गर्ने टोलीले ५ लाख प्राप्त गर्ने एन्फाले जनाएको छ । लिगमा कुल १४ टोलीहरुले सहभागिता जनाउँदै छन ।