शनिश्चरे । झापाको अर्जुनधारा १ सिस्नेस्थित सहिद टेकमान रंगशालामा जारी फुटबल प्रतियोगितामा बिर्तामोड १० को सैनिक ११ सेमिफाइनलमा प्रवेश गरेको छ ।

स्पर्धी मुजुरभिट्टा युवा क्लब केरखाको चुनौती समाप्त बनाउन सैनिकले टाइब्रेकरको सामना गर्नु परेको थियो । सैनिक टाइब्रेकरमा ४-२ गोलअन्तरमा जित निकाल्दै अन्तिम चारमा प्रवेश गरेको छ ।

निर्धारित समयमा दुवै टोलीले १-१ गोलको बराबरी खेलेका थिए । सुरुवाती गोल सैनिकका विकेश लिम्बूले गरे पनि केही मिनेट बित्न नपाउँदै केरखाका अंकित लिम्बूले गोल गरेर बराबरीमा ल्याएका थिए ।

तर, टाइब्रेकरमा केरखाका गोलरक्षक युवराज तामाङले एक प्रहार रोक्न सफल भए पनि सैनिकका गोलरक्षक समिर लिम्बूले २ गोल रोकेका थिए । उनी प्लेयर अफ दी म्याच बन्दै नगद १ हजार ५ सय प्राप्त गरे ।