काठमाडौं । प्रतियोगिताको शुरुवातबाटै आफ्नो बलियो दावेदारिता पेश गरेको स्पेनले युईएफए युरो-२०२४ को उपाधी चौथोपटक जित्न सफल भएको छ ।

आइतबार अबेर राती सम्पन्न फाइनलमा स्पेनले इङ्ल्याण्डको चुनौती २-१ ले पन्छाउँदै चौथोपटक युरोपको च्याम्पियन बन्न सफल भएको हो ।

जर्मन शहर बर्लिनमा भएको उपाधी भिडन्तमा दुवैतर्फबाट भएका तीन गोलहरु दोस्रो हाफमा मात्र सम्भव भएको थियो । खेलको ४७औं मिनेटमा निको विलियम्सले स्पेनका लागि शुरुवाती गोलको खाता खोलेका थिए ।

तर, वैकल्पिक खेलाडीका रुपमा मैदान प्रवेश गरेका कोल पाल्मरले ७३औं मिनेटमा इङ्लिश टोलीका लागि बराबरी गोल फर्काउन सफल भए । यद्यपि इङ्ल्याण्डले पनि त्यो बराबरी गोलको खुशी धेरैबेर मनाउन सकेन ।

अन्तिमतिर ८६औं मिनेटमा मिकेल उगार्टेले स्पेनका लागि दोस्रो तथा निर्णायक गोल गर्दै टोलीको रोमाञ्चक जित सुनिश्चित गरेका थिए ।

यो हारसँगै लगातार दोस्रोपल्ट युरोको फाइनल पुगेको इङ्ल्याण्ड फेरि पनि उपविजेता मै चित्त बुझाउन बाध्य बनेको छ । स्मरण रहोस, इङ्ल्याण्डले गत संस्करणको फाइनलमा इटालीसँग हार बेहोरेको थियो ।