पुनर्वास । सिद्धार्थ युवा क्लब, पुनर्वास नगरपालिका–७, कञ्चनपुरको आयोजनामा शनिबारदेखि शुरु भएको १५औं रनिङ्ग चाँदी कप फुटबल प्रतियोगितामा आरआर रोमानी फुटबल क्लबले एकतर्फी जितका साथ विजयी शुरुवात गरेको छ ।

प्रतियोगिताको उद्घाटन खेलमा आरआर रोमानीले आयोजक सिद्धार्थ युवा क्लब (सेतो) लाई ११–२ को फराकिलो अन्तरले हरायो । आरआर रोमानीका लागि हिमाल मल्ल एक्लैले ह्याट्रिकसहित पाँच गोल गर्दा जिन बहादुर तामाङ, अमर चन्द र प्रेम तामाङले समान दुई–दुई गोल गरे । उता पराजित सिद्धार्थका लागि भने विश्वास तामाङ र योगेन्द्र तामाङले गोल फर्काएका थिए ।

त्यसअघि प्रतियोगिताको उद्घाटन कार्यक्रमका प्रमुख अतिथी पुनर्वास इसाई समाजका अध्यक्ष पास्टर राजकुमार तामाङ लगायतले संयुक्त रुपमा उद्घाटन गरेका थिए ।

आउँदो असोज २७ गतेसम्म चल्ने प्रतियोगिताको विजेताले उपाधिसहित नगद २ लाख २२ हजारका साथ ६४ तोलाको आकर्षक चाँदीको ट्रफी हात पार्नेछ भने उपविजेताले १ लाख ११ हजारसहित ट्रफी, मेडल प्राप्त गर्ने आयोजकले जानकारी दियो ।