पुनर्वास । यहाँ जारी १५औं रनिङ चाँदी कप खुला नकआउट फुटबल प्रतियोगिता अन्तर्गत आफ्नो खेलमा जित हात पार्दै त्रिभुवन युवा क्लब प्रिक्वाटरफाइनलमा प्रवेश गरेको छ ।

त्रिभुवनले नवोदय युवा क्लबलाई पेनाल्टी शुटआउटमा हराउँदै प्रिक्वाटरफाइनल यात्रा तय गरेको हो । त्यसअघि निर्धारित समयतर्फ दुवै टोलीले १–१ गोलको बराबरी खेलेका थिए ।

निर्धारित समयतर्फ त्रिभुवनका लागि ओम भुलले गोल गरेका थिए भने नवोदयका लागि सन्तोष पौडेलले गोल गरेका थिए । टाईब्रेकरमा भने त्रिभुवन ५–३ ले विजयी बन्यो ।

स्मरण रहोस, त्रिभुवन र नवोदय बीचको खेल मंगलबार नै खेलाईए तापनि खराब प्रकाश र प्राविधिक कारणवश बिचैमा रोक्नु परेको थियो । साथै सोही रोकिएको बाँकी खेल बुधबार खेलाइएको थियो ।

सिद्धार्थ युवा क्लब, पुनर्वास नगरपालिका–७, कञ्चनपुरको आयोजनामा जारी प्रतियोगिताको विजेताले उपाधिसहित नगद २ लाख २२ हजारका साथ ६४ तोलाको आकर्षक चाँदीको ट्रफी हात पार्नेछ भने उपविजेताले १ लाख ११ हजारसहित ट्रफी, मेडल प्राप्त गर्ने आयोजकले जानकारी दियो । फाइनल खेल भने असोज २७ गतेका दिन हुनेछ ।