काठमाडौं । हालै मात्रै नेपाली फुटबल हाँक्ने एक्लो संस्था अखिल नेपाल फुटबल संघ (एन्फा) ले धेरैले अपेक्षा गरेको र पर्खाईमा रहेको शहिद स्मारक ए डिभिजन लिग आयोजना गर्नेबारे अन्यौलता देखाएपछि त्यसको अहिले चौतर्फी चर्चा र आलोचना भईरहेको छ ।
वर्षौंसम्म लिग नहुँदा निराश बनेका नेपाली फुटबल खेलाडीहरुमा नेपाली फुटबलको मेरुदण्डका रुपमा रहेको ए डिभिजन लिग यो वर्ष पनि अनिश्चित बन्दा खेलाडीहरुमा थप नैराश्यता थपिएको छ । कति खेलाडीको खेलेरै चलाउने गुजारा बनेको फुटबल नहुँदा विदेश पलायन हुने मनस्थितिमा छन् र कति त पलायन पनि भईसकेका छन् ।
लिग नहुँदाको मार र पिडामा ती तमाम खेलाडीहरुका बीच राष्ट्रिय टोलीमा रहेर खेलिरहेका अधिकांश खेलाडीहरु पनि परेका छन् । ती पिडाहरुलाई अभिव्यक्त गर्न नसकिरहेका बेला नेपाली फुटबलका चल्तीका खेलाडी तथा चर्चित डिफेन्डर अनन्त तामाङले भने लिग नहुनुको पिडा र गुनासोलाई ामाजिक सञ्जालमार्फत पोखेका छन् ।
अनन्तले मैदान बाहिर जे जस्तो भए पनि मैदान भित्र देशका लागि खेल्दा आफूहरुले शतप्रतिशत दिएको र दिने बताएका छन् । आफू भन्दा अगाडी र पछि करियर शुरु गरेका कतिपय खेलाडीहरु विदेश पलायन भईसकेको स्मरण गर्दै अनन्तले आफूहरु भने जस्तो सुकै परिस्थतिमा पनि अझै शतप्रतिशत दिएर खेलेको जिकिर गरेका छन् ।
अनन्त लेख्छन्, “तर आज भिएतनामको मैदानमा ’होम म्याच’ खेलेपछि नेपालमा लिग नहुने भन्ने चर्चाले निराशाको अर्को चरणमा पुगेको छु । र मैले फुटबल खेल्न एन्फा एकेडेमी पस्दा कुनैदिन यो परिस्थितिको सामना गर्नुपर्छ भनेर सोचेको पनि थिइनँ ।”
अनन्तका अनुसार एन्फाले लिग गर्ने जिम्मेवारी निसंकोच पूरा गर्नुपर्ने बताउँछन् । साथै त्यसमा सबैले एन्फालाई दबाब दिनुपर्ने समेत बताएका छन् । अनन्त भन्छन्, “खेलाडी र खेललाई जीवित राख्नकै लागि भएपनि लिग गर्नुहोस ।”
अनन्तले आफ्नो फेसबुकमा लेखेको स्टाटसको पूर्ण अंश पढ्नुहोसः
मैदानबाहिरको अवस्था जे जस्तो भएपनि हामी खेलाडीले देशको लागि मैदान भित्र पसेपछि सधैं शत प्रतिशत नै दिएका छौं र दिनेछौं पनि । हाम्रा प्रतिद्वन्द्वी लगातार उच्च स्तरको फुटबल खेलिरहेका हुन्छन्, तर हामीले आफ्नो देशमा लिग नखेलेको अब ३ वर्ष पुग्न लागिसक्यो । यसबीचमा मसँग करिअर सुरु गर्नुभएका, म भन्दा अघि खेल्न थाल्नुभएका र म भन्दा पछि खेल्न सुरु गर्नुभएका खेलाडी देश छाडेर गइसक्नुभयो । तर पनि हामी जो बाँकी छौं, सेवा-सुविधा-लिग-प्रशिक्षण जे जस्तो भएपनि आफ्नो शत प्रतिशत दिएर खेलिरहेका छौं । डटिरहेका छौं ।
तर आज भिएतनामको मैदानमा 'होम म्याच' खेलेपछि नेपालमा लिग नहुने भन्ने चर्चाले निराशाको अर्को चरणमा पुगेको छु । र मैले फुटबल खेल्न एन्फा एकेडेमी पस्दा कुनैदिन यो परिस्थितिको सामना गर्नुपर्छ भनेर सोचेको पनि थिइनँ ।
हो, म अहिले बंगलादेशको क्लबमा अनुबन्धित छु । तर अहिले म मेरो बारेमा मात्र सोच्छु भने स्वार्थी हुनेछु, किनकि फुटबल टिम गेम हो । जबसम्म मसँग राष्ट्रिय टिममा खेल्ने र राष्ट्रिय टिममा आउन घरेलु फुटबलमा खेल्ने खेलाडीले नियमित फुटबल खेल्न पाउँदैनन्, ठूला टिमसँग नतिजा अपेक्षा गर्नु गलत हुन्छ । ठूला टिम मात्र होइन, यस्तै स्थितिले निरन्तरता पाउने हो भने हामीले हराउँदै आएका टिमसँग पनि संघर्ष गर्ने आँकलन गरिरहेको छु ।
एन्फाले लिग गर्ने जिम्मेवारी त निसंकोच पूरा गर्नु नै छ । सँगसँगै म सहभागी क्लबहरुलाई म एक फुटबल खेलाडीको रुपमा अनुरोध गर्छु, तपाईंहरु फुटबल टिम निर्माण गरेर लिगको तयारी थाल्नुहोस् । एन्फाले फुटबल गराउन बाध्य पार्नुहोस । अझैपनि तपाईंहरु एन्फाको बाटो ताक्नुभयो भने, क्लबहरु मात्र कागजमा सिमित हुनेछन् र खेलाडी खोजेर पनि पाउने स्थिति हुँदैन ।
खेलाडी र खेललाई जीवित राख्नकै लागि भएपनि लिग गर्नुहोस ।
