काठमाडौं । एएफसी च्यालेञ्ज लिगतर्फ समूह चरणको अन्तिम खेलमा नेपालका मणि कुमार लामा सम्मिलित भुटानी लिग च्याम्पियन पारो फुटबल क्लबले बराबरी खेलेको छ ।

च्यालेञ्ज लिगको पश्चिम क्षेत्रतर्फको प्रतिस्पर्धातर्फ समूह ए मा रहेको घरेलु टोली पारोले खेलेको कुल तीन मध्ये शुक्रबार भएको आफ्नो अन्तिम खेलमा किर्गिस्तानको एफसी अब्दिश आतासँग ३–३ गोलको बराबरी खेलेको हो ।

पारोले यसअघि आफ्नो पहिलो खेलमा ओमानको अल–शबाबसँग १–० ले पराजित भएको थियो भने दोस्रो खेलमा तुर्कमेनिस्तानको एटलिन असिरसँग ३–१ ले पराजित भएको थियो ।

मणिले समूह चरणतर्फ पहिलो खेलमा शुक्रबार अन्तिम खेलमा पारोका लागि पहिलो रोजाई मै रहेर खेलेका थिए । शुक्रबार बराबरीका बावजुद पारो भने समूह चरणबाटै बाहिरिएको छ ।

समूह ए मा तीन खेलबाट ९ अंक जोडेको अल–शबाब शिर्ष स्थानमा रह्यो । ६ अंक जोडेको एटलिन दोस्रो स्थानमा रहँदा समान १–१ अंक जोडेका एफसी अब्दिश र पारो क्रमशः तेस्रो र चौथो स्थानमा रहे ।