धरान । स्व. अनुपम, आदित्य, दिवस, प्रियन्स, बिक्रम र साइमन स्मृति एन्फा यु–१४ छात्रा फुटबल प्रतियोगिताको उपाधि ज्वालामुखी मावि, धरानले जितेको छ ।

फाइनलमा ज्वालामुखीले भरौल बाल मन्दिर, बराहक्षेत्रलाई पेनाल्टी शुटआउटमा हराउँदै उपाधि जितेको हो । एन्फा एकेडेमी धरानको खेलमैदानमा निर्धारित समयको खेल गोलरहित बराबरीमा टुंगिएपछि पेनाल्टी शुटआउटमा ज्वालामुखी ५–४ ले विजयी बन्यो ।

विजेता बनेको ज्वालामुखीले उपाधिसहित नगद १५ हजार हात पार्दा उपविजेता भरौलले १० हजारसहित ट्रफी, मेडल र प्रमाणपत्रमा चित्त बुझायो । भरौल बाल मन्दिरकी मनिषा लिम्बु प्लेयर अफ दि म्याच बनिन् ।

अन्य विधातर्फ उत्कृष्ट गोलरक्षक ज्वालामुखीकी निशा परियार बन्दा सर्वाधिक गोलकर्ताको पुरस्कार पनि कुल ७ गोल गरेकी ज्वालामुखीकी सिमरन तामाङले हात पारे । प्रतियोगिताको सर्वश्रेष्ठ खेलाडी भने आयुषा कुलुङ राई घोषित भईन् ।

विजेता तथा उपविजेता खेलाडीहरुलाई समापन कार्यक्रमका प्रमुख अतिथी कोशी प्रदेश फुटबल संघका अध्यक्ष किशोर राई लगायतले पुरस्कृत गरेका थिए ।

सुनसरी जिल्ला फुटबल संघको आयोजना तथा अखिल नेपाल फुटबल संघ (एन्फा) को प्राविधिक सहयोगमा सम्पन्न प्रतियोगिताको छात्रातर्फ सुनसरी जिल्लाका कुल १२ टोलीहरुले सहभागिता जनाएका थिए ।