काठमाडौं । अखिल नेपाल फुटबल संघ (एन्फा) को आयोजनामा बिहीबारदेखि शहिद स्मारक सी डिभिजन लिग छनौट फुटबल प्रतियोगिता शुरु भएको छ ।

सातदोबाटो स्थित एन्फा कम्प्लेक्समा भएको उद्घाटन खेलमा नेपालगञ्ज–११ ले पाथीभरा फुटबल क्लबलाई २–१ ले हराउँदै विजयी शुरुवात समेत गर्यो ।

खेलको ५६औं मिनटमा प्रशान्त प्रधानको गोलबाट पाथीभराले खेलमा अग्रता लिए पनि त्यो अग्रता जोगाउन सकेन । खेलको इन्जुरी समयमा सुरेश खत्री र मदन स्याङतनले गोल गर्दै नेपालगञ्ज–११ को रोमाञ्चक जित पक्का गरे ।

त्यसअघि प्रतियोगिताको उद्घाटन एन्फा अध्यक्ष पंकज विक्रम नेम्वाङले गरेका थिए । सो अवसरमा एन्फा महासचिव किरन राई लगायतको पनि उपस्थिति रहेको थियो ।