काठमाडौं । म्यानमार जारी एएफसी यु–१७ एसियन कप छनौटतर्फ समूह जी मा रहेको नेपालले समूह चरणतर्फ आफ्नो लगातार तेस्रो खेलमा पनि निराशाजनक हार बेहोरेको छ ।

पहिलो खेलमा सिरियासँग ४–२ र दोस्रो खेलमा आयोजक म्यानमारसँग ४–० को हार बेहोरेको नेपालले बुधबार तेस्रो खेलमा ओमानसँग ५–० ले निरीह बन्न पुग्यो । यो लगातार तेस्रो हारसँगै अंकविहीन रुपमा पुछारमा रहेको नेपाल एक खेल अगावै समूह चरणबाट बाहिरिएको छ ।

समूह जी कै अर्को खेलमा बुधबार सिरियाले अफगानिस्तानलाई ३–१ ले हरायो । एउटै खेल जित्न नसकेको अफगानिस्तान पनि अंकविहीन छ र समूह चरणबाट नेपालसँगै बाहिरिएको छ ।

अब नेपालले र अफगानिस्तानले समूह चरणको अन्तिम खेलका रुपमा २८ नोभेम्बरका दिन आपसमा भिड्ने छन् । जुन खेल दुवै टोलीको प्रतिष्ठाको भिडन्त पनि हुनेछ ।