त्रियुगा । उत्कृष्ट जितका साथ उपाधिको बलियो प्रत्याशी आँकिएको एपिएफ फुटबल क्लब जारी रेडबुल एन्फा महिला च्याम्पियनसिपको फाइनलमा प्रवेश गर्ने दोस्रो टोली बनेको छ ।

उदयपुरको थरुहट रंगशालामा बिहीबार भएको दोस्रो सेमिफाइनलमा एपिएफले संकटा फुटबल क्लबमाथि ३–० को उत्कृष्ट जित निकाल्दै फाइनलमा आफ्नो यात्रा तय गरेको हो । खेलमा एपिएफकी मनमाया दमाई प्लेयर अफ दि म्याच बनिन् ।

अब एपिएफले यही फागुन ९ गते हुने फाइनलमा अर्को विभागीय टोली त्रिभुवन आर्मी फुटबल क्लबसँग उपाधिका लागि प्रतिस्पर्धा गर्ने एन्फाले जनाएको छ ।

अखिल नेपाल फुटबल संघ (एन्फा) को आयोजनामा जारी प्रतियोगिताको विजेताले उपाधिसहित नगद ७ लाख ५० हजार हात पार्नेछ भने उपविजेताले ५ लाख प्राप्त गर्नेछ ।