पोखरा । प्रथम पोखरा महिला गोल्डकप राष्ट्रिय नकआउट फुटबल प्रतियोगिताको उपाधि नेपाल पुलिस क्लबले जितेको छ । आइतबार सम्पन्न फाइनलमा पुलिसले अर्को विभागीय टोली त्रिभुवन आर्मी फुटबल क्लबलाई हराउँदै उपाधि उचाल्न सफल भएको हो ।

पोखरा रंगशालामा भएको निर्धारित समयको खेल गोलरहित बराबरीमा टुंगिएपछि पेनाल्टी शुटआउटमा पुलिस ५–४ ले विजयी बन्दै उपाधि जित्न सफल भएको हो । विजेता बनेको पुलिसले उपाधिसहित नगद ५ लाख हात पार्यो भने उपविजेता आर्मीले ३ लाखमा चित्त बुझायो ।

विधागततर्फ पुलिसकी निर्मला बिक प्रतियोगिता कै सर्वश्रेष्ठ खेलाडी घोषित भईन । उत्कृष्ट गोलरक्षक पुलिस कै उषा नाथ बन्दा सर्वाधिक गोलकर्ताको पुरस्कार पनि पुलिस कै रेखा पौडेलले हात पारिन् । त्यस्तै अनुशासित टोली आयोजक आरएस पोखरा फुटबल क्लब बन्दा फाइनल खेलको प्लेयर अफ द म्याच समिक्षा घिमिरे बनिन् ।