राजारानी । बिर्तामोड युनाइटेड फुटबल क्लब, झापा धनकुटामा जारी १३औं रारा रनिङ गोल्डकप खुला नकआउट फुटबल प्रतियोगिताको फाइनलमा प्रवेश गर्ने दोस्रो टोली बनेको छ ।

सोमबार सम्पन्न दोस्रो सेमिफाइनलमा बिर्तामोडले सलहेश युवा क्लब, सिराहालाई ३–१ को अन्तरले पराजित गर्दै फाइनलमा प्रवेश गर्ने दोस्रो टोली बन्न सफल भएको हो ।

बिर्तामोडको जितमा राजेश दाहालले ह्याट्रिक गर्दा सलहेशका लागि रिचार्डले एक मात्र गोल फर्काए । खेलमा प्लेयर अफ द म्याच भने बिर्तामोड युनाइटेडका संजय लिम्बु घोषित भए ।

बिर्तामोड युनाइटेडले अब यही बैशाख २२ गते मंगलबार हुने फाइनलमा आयोजक रारा फुटबल क्लब, धनकुटासँग उपाधिका लागि प्रतिस्पर्धा गर्ने आयोजकले जानकारी दियो ।

रारा फुटबल क्लब, राजारानी, धनकुटाको आयोजनामा जारी प्रतियोगिताको विजेताले उपाधिसहित नगद ७ लाख हात पार्नेछ भने उपविजेताले ३ लाख प्राप्त गर्नेछ ।