न्युज राजर्षि जनक कपः सिलिगुडीको कञ्चनजंघा एफसी क्वाटरफाइनलमा
गोलनेपाल

आयोजक बाग्मती युवा क्लबमाथि हाबी हुँदै पाहुना टोली भारत सिलिगुडीको कञ्चनजंघा एफसी यहाँ जारी पाँचौ राजर्षि जनक कप फुटबल प्रतियोगिताको क्वाटरफाइनलमा प्रवेश गरेको छ ।

स्व. सन्तोष श्रेष्ठ स्मृति खेल मैदानमा सोमबार भएको खेलमा आयोजक बाग्मती युवा क्लबलाई १-० गोलअन्तरमा स्तब्ध पार्दै पाहुना टोली कञ्चनजंघाले बाजी मारेको हो । कञ्चनजंघाका लागि अनमोल दाहालले निर्णायक गोल गरेका थिए ।

घरेलु दर्शकको समर्थन पाए पनि स्कोर हुन नसक्दा निरस बन्न पुगे । एकपछि अर्को आक्रमण बुनिरहेको कञ्चनजंघाका लागि अनमोल दाहालले खेलको २१औँ मिनेटमा आकर्षक गोल गरेर टिमलाई अग्रता दिलाएका थिए ।

खेलको दोस्रो हाफमा खेलमा फर्किने प्रयास गरे पनि बाग्मतीका खेलाडीले दर्शकको मन भने जित्न सकेनन् । यसैबीच, संघर्षका क्रममा दुवै टिमका खेलाडी घाइते हुन पुगे । बाग्मतीका सागर शाही र कञ्चनजंघाका राम राई घाइते भएपछि उनीहरुलाई थप उपचारका लागि हस्पिटल लगिएको थियो ।

खेलको म्यान अफ दी म्याच कञ्चनजंघाका सन्दिप लिम्बू घोषित भए । उनलाई हरिकृष्ण इण्डस्ट्रिजका व्यवस्थापक भगवान सापकोटाले नगद १० हजार र ट्रफी प्रदान गरे । यसैबीच, एक्साइटिङ फ्यान अफ दी म्याचको रुपमा स्थानीय फुटबलप्रेमी बालक मिजेन लामा चुनिए । राष्ट्रिय झण्डा फहराएर खेल हेरेका उनलाई खल्ती एपको तर्फबाट नगद २ हजार प्रदान गरियो ।

बाग्मती युवा क्लब र बाग्मती नगरपालिकाको संयुक्त आयोजनामा भएको प्रतियोगितामा विदेशी २ टोलीसहित १० टिम सहभागी छन् । प्रतियोगिताको विजेताले नगद १० लाख एक हजार पाउँदा उपविजेताले नगद ५ लाख ५ सय र ट्रफीमा चित्त बुझाउनु पर्नेछ ।

मंगलबारको खेल नव जागृति युवा क्लब सिमरा र सुदूरपश्चिम ११, सुदूरपश्चिबीच खेल हुनेछ ।

Post Comments