मैनिया । रोमाञ्चक जितका साथ मुर्गिया एफसी, मुर्गिया रुपन्देहीको गैंडहवा गाउँपालिकामा जारी प्रथम गैंडहवा अध्यक्ष कप खुला नकआउट फुटबल प्रतियोगिताको सेमिफाइनलमा प्रवेश गरेको छ ।

गैंडहवा–८ देवीनगर स्थित स्थानीय खेलमैदानमा भएको दोस्रो क्वाटरफाइनलमा मुर्गियाले दर्शन युवा क्लबलाई २–१ ले हराउँदै अन्तिम चारमा स्थान सुरक्षित गरेको हो । खेलमा पराजित दर्शन युवा क्लबका आरोस थापा म्यान अफ द म्याच घोषित भए ।

प्रतियोगिता अन्तरगत पौष १२ गते सोमबारको तेस्रो क्वाटरफाइनल खेल आयोजक न्यु एभरेष्ट युवा क्लब, मैनिया र गौतम बुद्ध सामुदायिक विकास केन्द्र, पिपरीचाँपाबीच हुने खेल संयोजक प्रकाश हमालले जानकारी दिए ।

न्यु एभरेष्ट युवा क्लबको आयोजना तथा गैंडहवा गाउँपालिकाको संरक्षकत्वमा जारी प्रतियोगिताको विजेताले उपाधिसहित १,११,१११ रुपैयाँ हात पार्नेछ भने उपविजेताले ५५,५५५ रुपैयाँ प्राप्त गर्ने आयोजकले जनाएको छ । प्रतियोगिताको फाइनल खेल यहि पौष १७ गतेका दिन हुनेछ ।