काठमाडौं । नेपाल सुपर लिग (एनएसएल) को दोस्रो संस्करणको नवआगन्तुक टोली झापा एफसीले प्रदिप हुमागाईंलाई आफ्नो मुख्य प्रशिक्षकमा नियुक्त गरेको कुरा आधिकारिक रुपमा घोषणा गरेको छ ।

हाल अमेरिकामा बसोबास गर्दै त्यहिको एक एकेडेमीमा समेत प्रशिक्षकको भूमिका निर्वाह गरिरहेका हुमागाईंले गत संस्करणको सुपर लिगमा ललितपुर सिटी एफसीको प्रशिक्षकीय जिम्मेवारी सम्हालेका थिए । उनले त्यसअघि ए डिभिजन लिगमा थ्रीस्टार क्लबलाई पनि आफ्नै प्रशिक्षकीय जिम्मेवारीमा राम्रो सफलता दिलाएका थिए ।

स्मरण रहोस, झापाले यसअघि नै आफ्नो मार्की खेलाडीका रुपमा अन्जन बिष्टले घोषणा गरिसकेको छ । नेपाल कै पहिलो निजी फुटबल क्लबका रुपमा आफूलाई उभ्याएको झापाले यस सिजन सुपर लिगमा राम्रो योजना लक्ष्य लिएको थियो ।

यहि चेत्र अन्तिम सातादेखि शुरु हुने तयारीमा रहेको नेपाल सुपर लिगको दोस्रो संस्करणमा यसपटक थपिएका तीन टोलीहरु सहित कुल १० टोलीहरुले प्रतिस्पर्धा गर्नेछन् । गत संस्करणको उपाधि भने काठमाडौं रेजर्सले जितेको थियो ।