काठमाडौं । बिहीबारदेखि शुरु हुन गईरहेको साफ यु–१९ च्याम्पियनसिपतर्फ आयोजक नेपालले समूह ए तर्फ आफ्नो पहिलो खेलमा पाकिस्तानको सामना गर्दैछ ।

दशरथ रंगशालामा बेलुका ५ः३० बजेदेखि शुरु हुने खेल दुवै टोलीका लागि महत्वपूर्ण हुनेछ । घरेलु मैदान र घरेलु समर्थकको साथ रहने नेपाललाई यसपटक दावेदार कै रुपमा पनि हेरिएको छ ।

नेपाली टोलीका मुख्य प्रशिक्षक सुनिल श्रेष्ठ र कप्तान जियारथ शेख पनि टोलीलाई उपाधि जिताउनेमा आत्मविश्वासी पनि छन् । नेपालले आज जित निकाल्न सके सेमिफाइनल प्रवेशको सम्भावना पनि बलियो बनाउनेछ ।

समूह ए मा नेपाल र पाकिस्तान बाहेक माल्दिभ्स पनि सामेल छन् । त्यस्तै समूह बी मा साविक विजेता भारतसँगै बंगलादेश र भुटान रहेका छन् । भारत र बंगलादेश संस्करणको विजेता तथा उपविजेता टोली पनि हुन् । समूहको शिर्ष दुई टोली सेमिफाइनलमा प्रवेश गर्नेछ ।